នៅយប់នេះ នឹងមានការប្រកួត ៤ គូផ្សេងទៀត នៅឯព្រឹត្តិការណ៍ FIFA World Cup 2022 ហើយក៏នឹងមានផ្សាយបន្តផ្ទាល់លើទំព័រ CTS Sports ផងដែរ។ ទោះជាយ៉ាងណាសង្កេតឃើញថា មានមួយគូ កំពុងត្រូវបានបងប្អូនយើងលើកមកជជែកវែកញែកច្រើន គឺជំនួបអេស្ប៉ាញ ទល់អាល្លឺម៉ង់ វេលាម៉ោង ០២:០០ នាទីទាបភ្លឺ ឈានចូលព្រឹកថ្ងៃទី ២៨ វិច្ឆិកា។
ងាកទៅអតីតជើងចាស់លោក Lukas Podolski ធ្លាប់ឈ្នះជើងឯកជាមួយអាល្លឺម៉ង់ នៅ World Cup នាសម័យកាលឆ្នាំ ២០១៤ បានលើកឡើងថា ជម្រើសជាតិខ្លួនរាត្រីនេះមិនអាចមើលស្រាលបានទេ ព្រោះមិនមែនជាកូស្តារីកា ងាយឲ្យអេស្ប៉ាញហូបស្រួលៗឡើយ។
លោក Podolski បានលើកឡើងប្រាប់សារព័ត៌មាន AS៖ “ខ្ញុំអត់បានទស្សនាប្រកួតកូស្តារីកាថ្ងៃមុនទេ តែលទ្ធផលអាចបង្ហាញឲ្យយើងយល់ច្បាស់ពីគុណភាពក្រុមពួកគេហើយ នេះអ្នកមិនអាចលេង World Cup ហើយមករបូតដល់ ៧ គ្រាប់បែបហ្នឹងទេ តែអាល្លឺម៉ង់គឺផ្សេងត្រូវដឹង មិនមែនជាកូស្តារីកាឡើយ”។
លោកបន្ត៖ “ជំនួបយប់នេះ គឺតែងតែតាន.តឹង តែវាក៏នឹងខុសប្លែកពីពេលមុន ខ្ញុំអត់គិតថា ពួកគេនឹងលេងរបៀបចតឡានក្រុងទេ វានឹងក្លាយជាប្រកួតសម្រុកទៅមក ខណៈក្រុមលោក Luis Enrique ក៏នឹងចង់យកឈ្នះដូចគ្នា”៕
ប្រភព៖ BeSoccer