ក្លឹបសារិកាព្រៃ Newcastle United មិនបានមើលទៅឯណាឆ្ងាយ ដោយបែរសម្លឹងមកគោលដៅក្បែរគ្នា ជាកីឡាកររបស់ក្លឹប Manchester United នៅតំណែងបម្រើ តែជាចំណែកឥតខ្វះបានរបស់ក្លឹបដឹកនាំដោយលោក Erik ten Hag នៅរដូវកាលនេះ។
នោះគឺ Scott McTominay ដែលបង្ហាញខ្លួនជាប់លាប់សឹងគ្រប់ការប្រកួតឲ្យក្លឹបបិសាចក្រហម ២៤ ប្រកួត សរុប ១ ១៤៦ នាទី ក៏រកបាន ២ គ្រាប់និង Assist ១ លើកផងដែរ។ ប្រភពពី The Mirror ចុះផ្សាយថា ក្លឹបដឹកនាំដោយលោក Eddie Howe បានមើលឃើញគុណភាពរបស់កីឡាករសញ្ជាតិស្កុតឡែន ហើយចង់នាំយកគេមកចូលរួមឲ្យបានឆាប់។
ទោះយ៉ាងណា Newcastle ក៏ទំនងនឹងតម្រូវឲ្យរង់ចាំដល់បញ្ចប់រដូវកាល ឬរដូវក្តៅឯណោះ ដ្បិតអីក្លឹបអាណាព្យាបាលនឹងមិនរំពឹងដោះ.លែងកីឡាករសំខាន់នាពាក់កណ្តាលរដូវកាលឡើយ។ ទន្ទឹមសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៥ ក៏នាំឲ្យហាងឆេងតម្លៃខ្លួន McTominay អាចចូលល្បាក់ ៣០ទៅ ៤០ លានផោន វាជាទំហំចំណេញលើគោក ដ្បិតជាអតីតយុវជនថ្នាល Promote ឡើង។
គួរឲ្យដឹងដែរថា Newcastle កំពុងឈរចំណាត់ថ្នាក់ទី ៣ នៅ Premier League ដោយរំពឹងខ្ពស់អាចបានកៅអី Champions League រដូវកាលក្រោយ។ ចំណែកឯនៅពាន EFL Cup ពួកគេក៏ប្រហែលអាចនឹងជួប Man Utd នៅវគ្គផ្តាច់ព្រ័ត្រខាងមុខក៏ថាបាន៕
ប្រភព៖ The Mirror