អតីតជើងចាស់បិសាចក្រហមលោក Rio Ferdinand បានបង្ហាញការយល់ឃើញ ពាក់ព័ន្ធអនាគតរបស់តារាឆ្នើមនៅតំបន់បម្រើប្រយុទ្ធរបស់ក្លឹប Arsenal គឺ Martin Odegaard ថានៅពេលវេលានៃបញ្ចប់រដូវកាល ២០២២/២៣ ប្រសិនជាបន្តល្អ នោះគេនឹងក្លាយជាកីឡាករល្អបំផុត ពោលយកឈ្នះទាំងលើ Erling Haaland ទៅទៀត។
ជាការពិតកីឡាករន័រវេស បានក្លាយជាចំណែកឥតខ្វះបាន ក្រោមការត្រួសត្រាយរបស់អ្នកចាត់ការលោក Mikel Arteta។ បើយើងមកមើលស្ថិតិ ជួនពេលក្លឹបកំពុងឈរកំពូលតារាង Premier League សម្រាប់កីឡាករខាងលើ បង្ហាញខ្លួនសរុប ២៥ ប្រកួត ក៏រកបាន ៨ គ្រាប់និង Assist ៦ លើក។
ងាកទៅការយល់ឃើញរបស់លោក Ferdinand លើប៉ុស្តិ៍កម្មវិធី ‘Vibe with Five’៖ “ប្រសិន Arsenal ឈ្នះពានលីគកំពូល ហើយ Haaland មិនអាចបំបែកកំណត់ត្រាការរកគ្រាប់បាល់អ្វីនោះទេ ជាការពិត Odegaard គឺជាបេក្ខភាពអាទិភាពនឹងឈ្នះពានកីឡាករល្អបំផុតប្រចាំឆ្នាំ Player of the Year មិនខានឡើយ”។
លោកបន្ត៖ “ជាងនេះទៀត បើគេចាកចេញពី Arsenal ក្នុងស្ថានភាពពេលនេះ មានតែ Barcelona ទេ ជាទ្រនំដ៏សក្តិសមបំផុត ហើយ Odegaard នឹងទទួលបានឱកាសដ៏ល្អនៅទីនោះមិនខាន”។ រំឭកដែរថា មុននេះមុនការផ្ទេរមក Arsenal គឺ Odegaard ធ្លាប់ជាថ្នាលរបស់ Real Madrid ម្ល៉េះការផ្ទេរទៅក្លឹបនៅតំបន់កាតាឡូញ៉ាប្រហែលមានភាគរយទាបណាស់៕
ប្រភព៖ BeSoccer