មិនមានផែនការណ៍បន្តទៅមុខទៀតទេ ជាមួយ Harry Maguire នេះក្លឹប Manchester United គិតចង់លក់ចេញនៅទីផ្សារដោះដូររដូវក្តៅ ឆ្នាំ ២០២៣ មុនការផុតកុងត្រាសេសសល់ដល់ចុងខែមិថុនា ឆ្នាំ ២០២៥។
ចំពោះហាងឆេងតម្លៃខ្លួន ខាងក្លឹបអាណាព្យាបាលដាក់មកតែម្តង គឺត្រឹម ៤០ លានផោនប៉ុណ្ណោះ ទំហំនេះ ទាបជាងឆ្ងាយ ធៀបនឹងតម្លៃដើម កាលក្លឹបម្ចាស់ដី Old Trafford ទិញយកកីឡាករអង់គ្លេស ពីក្រុមកញ្រ្ជោងខៀវ Leicester City នៅរដូវក្តៅ ឆ្នាំ ២០១៩ ថ្លៃ ៧៥ លានផោន។
តាមសារព័ត៌មាន Football Transfer ចុះផ្សាយ ក្លឹបលោក Erik ten Hag ជាអ្នកចាត់ការពិតជាចង់បង្ខំលក់ចេញកីឡាករវ័យ ៣០ ឆ្នាំខាងលើ ស្របពេលតាមដំណឹងល្ហិចល្ហៀងមានក្លឹប ២ នៅអង់គ្លេសក៏ចាប់ចិត្ត តួយ៉ាងគឺ West Ham និង Tottenham Hotspur តែការព្រមទទួលយកតម្លៃនោះឬអត់ មិនទាន់ច្បាស់នៅឡើយ។
រំឭកឲ្យដឹងពេលចុងក្រោយ Maguire មិនសូវជាមានឱកាសដូចមុនទៀតទេ ដោយបង្ហាញខ្លួនត្រឹម ៣០ ប្រកួតច្រើនបម្រុង គិតចំនួននាទីឈរជើងសុទ្ធតែ ១ ៥០៩ នាទីប៉ុណ្ណោះលើទីលានឲ្យបិសាចក្រហម។ នេះបន្ទាប់តែការមកដល់នូវវត្តមានតំបន់ស្នូលការពារដ៏រឹងមាំពីររូប គឺ Raphael Varane និង Lisandro Martinez៕
ប្រភព៖ Football Transfer