ក្លឹប AS Roma មិនអាចយកជ័យជម្នះពីក្លឹបភ្ញៀវ Bologna បានទេកាលពីយប់មិញ ពោលរងបរាជ័យ ០-២ ទោះយ៉ាងណាចាប់អារម្មណ៍នៅកំឡុងតង់ទីពីរ ពាក់ព័ន្ធការប្តូរចូលប្តូរចេញត្រឹមចន្លោះពេល ១៨ នាទី នៃ Renato Sanches ហាក់ធ្វើឲ្យកីឡាករមានភាពស្រងាកចិត្ត ហើយអ្នកគាំទ្រក៏ងឿងឆ្ងល់ណាស់ដែរ។
ជាការពិតនៅដើមតង់ទីពីរ Jose Mourinho ជាអ្នកចាត់ការ បានជ្រើសប្តូរចូល Sanches លុះដល់ ១៨ នាទីបន្ទាប់ក៏ប្តូរគេចេញត្រលប់មកវិញ ក្រោមហេតុផលនៃការសម្រេចចិត្តដោយសារបញ្ហាបច្ចេកទេស ខណៈកីឡាករមិនមានប៉ះទង្គិចកើតរបួសអ្វីឡើយ។
បន្ទាប់ចប់ការប្រកួត គ្រូសញ្ជាតិព័រទុយហ្គាល់បានរៀបរាប់ប្រាប់ទៅ DAZN យ៉ាងដូច្នោះថា៖ “ខ្ញុំពិតជាចង់សុំទោសជាសាធារណៈចំពោះ Renato Sanches វាពិតជារឿងដ៏ពិបាកមួយសម្រាប់កីឡាករបាល់ទាត់ តែសម្រាប់ខ្ញុំជាអ្នកចាត់ការក៏ដូចគ្នាដែរ ក្នុងអាជីពមួយនេះ ខ្ញុំធ្លាប់បានធ្វើវាតែ ៣ ទៅ ៤ លើកប៉ុណ្ណោះ វាមិនជារឿងងាយឡើយ”។
គួរឲ្យដឹងថា បើទោះបីជាបុរសរួមសញ្ជាតិព័រទុយហ្គាល់តែមួយ តែការប្រើប្រាស់កីឡាករខ្ចីជើង Sanches សម្រាប់ Mourinho គឺមានកំហិតនៅរដូវកាលនេះ។ ត្រង់ស្ថិតិឈរជើងត្រឹម ៩ ប្រកួត គេអាចរកបាន ១ គ្រាប់ ភាគច្រើនជាកីឡាករបម្រុង ឈរជើងសរុបត្រឹម ២២៨ នាទី៕
ប្រភព៖ DAZN