ស្ថានភាពរបស់ Neymar នៅក្លឹប PSG ហាក់មានរឿងផ្ទៃក្នុងមួយចំនួនដែលទាក់ទងនឹងទំនាក់ទំនងរវាងមិត្តរួមក្រុម Edinson Cavani ជាមួយនឹងការខកចិត្តដែលក្រុមបារាំងមិនអាចដើរគន្លងជោគជ័យក្នុងក្របខ័ណ្ឌ Champions League ដូចការប្រាថ្នាទុក រហូតបង្ខំចិត្តឲ្យខ្សែប្រយុទ្ធសញ្ជាតិប្រេស៊ីលអេះអុញចង់ដើរចេញពីប៉ារីស។
យោងតាមសារព័ត៌មាន Don Balon បានឲ្យដឹងថា Neymar ក៏ប្រាប់ទៅឪពុករបស់ខ្លួនឲ្យចុះរត់ការជាមួយក្លឹប Real Madrid, Barcelona និង Manchester City ដើម្បីរកឱកាសល្អណាមួយយកខ្លួនទៅលេងក្នុងចំណោមក្លឹបយក្សទាំងបីនោះវិញ។
បុរសវ័យ ២៦ ឆ្នាំគឺឈរលើរ៉ាដាសម្លឹងចង់បានពីលោក Florentino Perez នៃក្រុមអធិរាជសខ្លាំងបំផុត ក្រោយ Madrid ទើបតែបាត់បង់តារាឆ្នើម Cristiano Ronaldo។ ចំណែកឯ City ក៏ដូចជាមិនចាំបាច់ទិញអ្នកថ្មីចូលនោះទេ ព្រោះប្រព័ន្ធលេងរបស់ពួកគេសព្វថ្ងៃគឺល្មមនឹងទទួលយកបានណាស់ទៅហើយ ផ្ទុយទៅវិញសម្រាប់ Barca ពិតណាស់ដែលពេញចិត្តនឹងការវិលរបស់ Neymar ក្រោយជោគជ័យរួមគ្នាអស់រយៈពេល ៤ ឆ្នាំនៅ Camp Nou។
ប្រភព:Caughtoffside