ខ្សែប្រយុទ្ធចំនូលថ្មីរបស់ក្លឹប Sevilla កីឡាករ Munir El Haddadi បានអះអាងថា គ្រូបង្វឹក Ernesto Valverde របស់ Barcelona បានហាមឃាត់រូបគេ មិនអោយចូលលេង តាមការចាត់ចែងរបស់ក្លឹប ដោយសារតែរូបគេមិនព្រមបន្ដកុងត្រាថ្មី។
Munir ជាកីឡាករដែលលេចធ្លោមួយរូបក្នុងចំនោម កីឡាករមកពីថ្នាលយុវជនរបស់ Barca ប៉ុន្ដែរូបគេហាក់មិនអាចដណ្ដើមប្រជាប្រិយភាព និង ឱកាសនៃការចូលលេងនៅក្នុងឈុតធំរបស់ក្លឹបនៅតំបន់ប្រយុទ្ធ។
បន្ទាប់ពីមានឱកាសជាប់ជម្រើសដំបូងតែ១ប្រកួតក្នុងរយៈពេលពាក់កណ្ដាលរដូវកាល Munir បានប្រាប់ទៅក្លឹបថា រូបគេមានបំណងចាកចេញ នៅពេលដែលផុតកុងត្រានៅចុងរដូវកាលនេះ។
ប៉ុន្ដែ Sevilla ទទួលបានឱកាសក្នុងការចចារ ហើយបានសំរេចនាំយករូបគេទៅចូលរួមនៅខែមករានេះ។
Munir បាននិយាយថា៖ “នៅពេលដែលខ្ញុំបានត្រលប់ពីលំហែកាយ(នៅដើមខែមករា) ខ្ញុំបានប្រាប់ទៅក្លឹបថា ខ្ញុំមិនចង់តកុងត្រានោះទេ។
“គ្រូបង្វឹក[Valverde] បានប្រាប់ខ្ញុំថា គាត់ទទួលបញ្ជាពីថ្នាក់លើ ក្នុងការហាមឃាត់ក្នុងការដាក់ខ្ញុំអោយចូលលេង។ ខ្ញុំព្យាយាមហ្វឹកហាត់ ហើយខ្ញុំមានសំណាង ដែលបានចូលរួមជាមួយ Sevilla មុនខែមិថុនាមកដល់។
ប្រភព៖ AS