បច្ចុប្បន្ន យើងសង្កេតឃើញថា ក្នុងវិស័យបាល់ទាត់តំបន់អឺរ៉ុប មានកីឡាករបាល់ទាត់ដែលមានដើមកំណើតជាជនជាតិអាស៊ីជាច្រើន កំពុងតែប្រឡូកនៅក្នុងវិស័យមួយនេះ ហើយក៏ទទួលបានភាពជោគជ័យគួរឲ្យកត់សម្គាល់ដូចជាកីឡាករ Sinji Kagawa, Park Ji-Sung, Yuto Nagatomo ដែលសុទ្ធសឹងតែជាកីឡាកររៀមច្បង ធ្លាប់ទទួលបានកេរិ៍្តឈ្មោះយ៉ាងល្បីល្បាញ។
ដោយឡែកសម្រាប់អត្ថបទនេះវិញ CamboTrends នឹងណែនាំប្រិយមិត្តឲ្យមកស្គាល់កីឡាករអាស៊ីទាំង ១០ រូបនាពេលបច្ចុប្បន្នដែលកំពុងតែមានតម្លៃខ្លួនថ្លៃបំផុតវិញម្ដង។ បើតាមរបាយកាណ៍ដែលទទួលបានពីគេហទំព័រ Sportskeeda បានចុះផ្សាយថា កីឡាករអាស៊ីទាំង ១០ រូបនោះមានដូចខាងក្រោម៖
១០. Wu Lei (សញ្ជាតិចិន/លេងនៅក្លឹប RCD Espanyol) មានតម្លៃខ្លួន ៨ លានអឺរ៉ូ
ជាកីឡាករជនជាតិចិនតែមួយរូបគត់ ដែលកំពុងមានឈ្មោះលេងនៅលីគកំពូលអឺរ៉ុប ដោយ Wu Lei មកដល់ក្លឹប Espanyol នៅឆ្នាំ ២០១៨ ក្រោយចាយពេលជោគជ័យអស់ ១៤ ឆ្នាំនៅប្រទេសកំណើត។
ស្លាបប្រយុទ្ធរូបនេះ ធ្លាប់ជាកីឡាករស៊ុតបានច្រើនបំផុតលំដាប់ទី ២ នៅលីគកំពូលចិនដោយរកបាន ១០២ គ្រាប់ និងជាកីឡាករបង្ហាញខ្លួននៅវ័យក្មេងបំផុតតាំងពីអាយុ ១៤ ឆ្នាំមកម្ល៉េះ។
៩. Daichi Kamada (សញ្ជាតិជប៉ុន/លេងនៅក្លឹប Eintracht Frankfurt) មានតម្លៃខ្លួន ៨ លានអឺរ៉ូ
Daichi Kamada ត្រូវបានគេចាត់ទុកថាជា កីឡាករវ័យក្មេងដ៏កំពូលមួយរូបនៅប្រទេសជប៉ុន ដោយសារតែបច្ចេកលេងបាល់យ៉ាងល្អរបស់គេ។ កីឡាករវ័យ ២៣ ឆ្នាំរូបនេះក៏បានបង្ហាញសមត្ថភាពដ៏បិនប្រសព្វនារដូវកាលនេះផងដែរ សម្រាប់ព្រឹត្តិការណ៍ Europa League ដោយរកបាន ៦ គ្រាប់ សរុបទាំងការរកបាន Hat-trick ពេលប៉ះនឹងក្រុម RB Salzburg។
៨.Takumi Minamino (សញ្ជាតិជប៉ុន/លេងនៅក្លឹប Liverpool) មានតម្លៃខ្លួន ១០ លានអឺរ៉ូ
ចំពោះកីឡាកររូបនេះវិញអាចនឹងត្រូវបានគេស្គាល់ច្រើនជាងអ្នកទាំង ២ ខាងលើ ដោយសារតែទើបផ្ទេរមកកាន់ក្រុមហង្សក្រហមនៅដើមឆ្នាំ ២០២០ តែមកទល់នឹងពេលនេះទើបតែបានបង្ហាញខ្លួន ៣ ប្រកួតគត់នៅ Premier League។
៧. Hwang Hee-chan (សញ្ជាតិកូរ៉េខាងត្បូង/លេងនៅក្លឹប RB Salzburg) មានតម្លៃខ្លួន ១០ លានអឺរ៉ូ
ដោយឡែកសម្រាប់ Hwang Hee-chan វិញត្រូវបានគេចាត់ទុកជា តារាឆ្នើមមួយរូបរបស់ក្រុម RB Salzburg ហើយសម្រាប់រដូវកាលនេះ គេរកបាន ១៣ គ្រាប់ និង Assist ១៦ លើក សម្រាប់ការបង្ហាញខ្លួនសរុប ២៩ ប្រកួត។
៦.Takehiro Tomiyasu (សញ្ជាតិជប៉ុន/លេងនៅក្លឹប Bologna FC) មានតម្លៃខ្លួន ១៣ លានអឺរ៉ូ
Takehiro Tomiyasu បានធ្វើឲ្យមានការភ្ញាក់ផ្អើលយ៉ាងខ្លាំង ក្នុងថ្ងៃដែលរូបគេបង្ហាញខ្លួនលើកដំបូងជាមួយនឹងក្រុម Bologna ពោលគឺគេទទួលបាននាមជា MOTM (Man Of The Match) និងបន្តទទួលបានបានងារជាកីឡាករល្អបំផុតប្រចាំខែសីហានៅក្របខណ្ឌ Serie A ថែមទៀតផង។
៥. Lee Kang-in (សញ្ជាតិកូរ៉េខាងត្បូង/លេងនៅក្លឹប Valencia) មានតម្លៃខ្លួន ១៣,៥ លានអឺរ៉ូ
កីឡាករអាស៊ីរូបនេះវិញ ត្រូវបានក្រុមប្រចៀវ Valencia យកមកបណ្ដុះបណ្ដាលអស់រយៈពេលរាប់ឆ្នាំមកហើយ ពោលគឺតាំងពីរូបគេមានវ័យត្រឹម ១០ ឆ្នាំមកម៉្លេះ។ រហូតដល់ឆ្នាំ ២០១៨ ទើបរូបគេមានឈ្មោះលេងនៅឈុតធំ និងជាចំណែកមួយដែលជួយឲ្យក្រុមទទួលបានជោគជ័យក្នុងការលើកពាន Copa Del Rey កាលពីឆ្នាំទៅផងដែរ។
៤. Takefusa Kubo (សញ្ជាតិជប៉ុន/លេងនៅក្លឹប RCD Mallorca) មានតម្លៃខ្លួន ១៣,៥ លានអឺរ៉ូ
ចំពោះកីឡាករដែលទទួលបានរហស្សនាមជា “Messi ជប៉ុន” វិញបានផ្ទេរមកកាន់ក្រុម Real Madrid ដោយគ្មានតម្លៃខ្លួននៅឆ្នាំ ២០១៩ ប៉ុន្តែហាងឆេងថ្លៃខ្លួនបច្ចុប្បន្នគឺថ្លៃប្រមាណ ១៣,៥ លានអឺរ៉ូហើយ។ កីឡាករវ័យ ១៨ ឆ្នាំក៏បានអ្នកគាំទ្រកោតសរសើរពីសមត្ថភាពនៃការបញ្ជូនបាល់ និងការស៊ុតពីចម្ងាយដ៏បិនប្រសព្វរបស់គេផងដែរ។
៣. Sardar Azmoun (សញ្ជាតិអ៊ីរ៉ង់/លេងនៅក្លឹប Zenit St.Petersburg) មានតម្លៃខ្លួន ១៤,៥ លានអឺរ៉ូ
សម្រាប់កីឡាករ Sardar Azmoun ត្រូវបានកាសែតអង់គ្លេសដាក់រហស្សនាមឲ្យគេថាជា “Messi អ៊ឺរ៉ង់” ក្រោយការចូលរួមលេងជាមួយនឹងក្រុម Zenit St.Petersburg កាលពីឆ្នាំ ២០១៨ និងរកបាន ២៦ គ្រាប់រួមអមការ Assist ១០ លើកក្នុងការបង្ហាញខ្លួនសរុប ៤៥ ប្រកួត។
២. Shoya Nakajima (សញ្ជាតិជប៉ុន/លេងនៅក្លឹប FC Porto) មានតម្លៃខ្លួន ១៦ លានអឺរ៉ូ
ដោយឡែកសម្រាប់កីឡាករ Nakajima មានទេពកោសល្យយ៉ាងល្អនិងធ្លាប់បានឈ្នះពានរង្វាន់កីឡាករល្អដាច់គេកាលពីឆ្នាំ ២០១៦ អំឡុងពេលលោកលេងនៅឈុត U-23 ហើយដោយសារតែសម្លឹងឃើញសមត្ថភាពមួយនេះទើបក្លឹប Porto សម្រេចចិត្តចុះកុងត្រាជាមួយនឹងលោកតែម្ដង។ ប៉ុន្តែក្រោយពីលេងជាមួយនឹងក្រុម Porto មក រូបលោកហាក់ធ្លាក់ទម្រង់លេងយ៉ាងគំហុក ពោលគឺរកបានត្រឹមមួយគ្រាប់ប៉ុណ្ណោះសម្រាប់ការបង្ហាញខ្លួនសរុប ២៨ ប្រកួត។
១. Son Heung-Min (សញ្ជាតិកូរ៉េខាងត្បូង/លេងនៅក្លឹប Tottenham Hotspur) មានតម្លៃខ្លួន ៦៤ លានអឺរ៉ូ
ដូចដែលដឹងច្បាស់ក្នុងចិត្តហើយថា នាពេលបច្ចុប្បន្នគ្មានកីឡាករអាស៊ីរូបណាដែលមានតម្លៃខ្លួនស៊ីដាច់តារាឆ្នើមរបស់មាន់ខ្នាយមាសរូបនេះបានឡើយ។ មិនត្រឹមតែជាកីឡាករអាស៊ីដែលមានតម្លៃខ្លួនថ្លៃបំផុតទេ Son Heung-Min ក៏ជាកំពូលកីឡាករមួយរូបដែលកំពុងតែទទួលបានភាពល្បីល្បាញទាំងនៅក្នុងលីគកំពូល EPL និងនៅទ្វីបអាស៊ីថែមទៀតផង៕
ប្រភព: Sportskeeda
អានអត្ថបទបន្ទាប់់៖ រ៉ាដា Liverpool ចង់បានរូបនេះ ត្រូវក្លឹបមេបញ្ជាក់ច្បាស់ហើយថាមិនអាចលក់ទាបជាងតម្លៃទីផ្សារបានទេ
ក្លឹបហង្សក្រហម Liverpool ត្រូវបានអ្នកគាំទ្រដឹងថា កំពុងតែព្យាយាមសាកសួរអំពីលទ្ធភាពនៃការនាំយករ៉ដារបស់ខ្លួនមួយរូបពីក្របខណ្ឌ Bundesliga ដែលម្នាក់នោះគឺ Timo Werner ដែលជាខ្សែប្រយុទ្ធរបស់ក្លឹប RB Leipzig។
ទន្ទឹមនឹងនោះ មេធំ Oliver Mintzlaff របស់ក្លឹប Leipzig បានមានប្រសាសន៍ទាក់ទងនៅនឹងរឿងរ៉ាវមួយនេះផងដែរ ដោយលោកបញ្ជាក់ថា មិនអាចលក់ Timo ក្នុងតម្លៃទាបជាងទីផ្សារបាននោះឡើយ។
យោងទៅតាមរបាយការណ៍ដែលទទួលបានពីគេហទំព័រ Sport Bild បានឲ្យដឹងថា តម្លៃផ្ដាច់កុងត្រារបស់ខ្សែប្រយុទ្ធវ័យ ២៤ ឆ្នាំគឺប្រមាណ ៥៥ លានអឺរ៉ូ ដែលតម្លៃមួយនេះបានធ្វើឲ្យក្រុមហង្សក្រហមមានការរារែកចិត្តក្នុងការទិញយករូបគេមកលេងនៅទឹកដី Anfield។
លោក Mintzlaff បានប្រាប់ទៅសារព័ត៌មានថា៖ “ វានឹងមិនមានការលក់ចេញនូវតម្លៃទាបណាមួយនោះទេ ពោលគឺយើងមិនលក់កីឡាករក្រោមតម្លៃទីផ្សារឡើយ ប្រសិនបើគេនៅជាប់កុងត្រាជាមួយក្លឹបច្រើនជាងរយៈពេលមួយឆ្នាំ។ ជាទូទៅយើងតែងតែសួរជាមុនសិនថា តើយើងអាចរកកីឡាករដទៃមកជំនួសគេបានឬអត់ ប្រសិនយើងលក់គេនៅតម្លៃទាបជាងហាងឆេងទីផ្សារ?”៕
ប្រភព: AF