ក្លិបយក្សអ៊ីតាលី Juventus នៅតែចិញ្ចឹមចិត្តចង់បានខ្សែបម្រើឆ្នើម Saul Niguez របស់ក្លិប Atletico Madrid សម្រាប់ការដោះដូរនៅរដូវក្ដៅនេះ។
កីឡាករជនជាតិអេស្ប៉ាញរូបនេះ មានការផ្សារភ្ជាប់ទៅនឹងការចាកចេញពីទឹកដី Wanda Metropolitano កាលពី១២ខែមុន នៅពេលក្លិប Manchester United ក៏ចង់បានរូបគេផងដែរ។
ទោះបីជានៅសល់កិច្ចសន្យាសម្រាប់ក្រុមលោក Diego Simeone រហូតដល់ឆ្នាំ២០២៦ ជាមួយតម្លៃផ្ដាច់កិច្ចសន្យា១០០លានផោនក៏ពិតមែន ប៉ុន្ដែ Saul ពុំស្ថិតនៅក្នុងជម្រើសដែលទុកចិត្តបានរបស់គ្រូបង្វឹកអហ្សង់ទីនរូបនេះឡើយ។
ខ្សែបម្រើវ័យ២៦ឆ្នាំ ទទួលបានឱកាសតែ២២លើកប៉ុណ្ណោះ ក្នុងចំណោម៣៨ប្រកួតក្នុងលីគ ដែលពួកគេក្លាយជាជើងឯកថ្មីៗនេះ ខណៈ Koke និង Marcos Llorente ជាកីឡាករសំខាន់នៅតំបន់បម្រើរបស់លោក Simeone។
បើតាមការចុះផ្សាយរបស់សារព័ត៌មាន Marca បានឱ្យដឹងថា Juventus នឹងផ្ដល់ឱ្យនូវសំណើចំពោះការផ្ទេរ Saul ជាមួយនឹងតម្លៃសាកល្បង ៧០លានអឺរ៉ូ៕
ប្រភព៖ Football Espana
អានអត្ថបទបន្ទាប់៖ ភ្ញាក់ផ្អើ.ល! Man City រាយឈ្មោះខ្សែប្រយុទ្ធជួរមុខ ២ រូប ដែលអាចត្រូវវ៉ៃចេញ នៅរដូវក្តៅខាងមុខនេះ
ក្រុមមេឃខៀវ Manchester City កំពុងត្រៀមខ្លួនរួចជាស្រេច ក្នុងការលក់ខ្សែប្រយុទ្ធ Riyad Mahrez និង Raheem Sterling នៅក្នុងទីផ្សារដោះដូរកីឡាករ នៅរដូវក្តៅខាងមុខនេះ ។
ជាក់ស្តែងបើទោះបីជាអាចស៊ុតបញ្ចូលទី ១៤ គ្រាប់និង assist បាន ១២ លើក នៅគ្រប់ការប្រកួតទាំងអស់នៅរដូវកាលនេះក៏ដោយ ប៉ុន្តែ Sterling នៅតែមិនអាចជ្រៀតចូលជម្រើសដំបូងរបស់គ្រូបង្វឹកលោក Pep Guardiola បាននោះទេ ខណ:ការប្រកួតវគ្តផ្តាច់ព្រ័ត្រពានរង្វាន់ Champions League នៅរាត្រីថ្ងៃសៅរ៍នេះ វាត្រូវគេរំពឹងថាខ្សែប្រយុទ្ធអង់គ្លេសរូបនេះ អាចនឹងអង្គុយកៅអីបម្រុងថែមទៀតផង ។
ទន្ទឹមនឹងនេះ Mahrez ដែលតែងតែត្រូវបានគេចាត់ទុកថាជាផ្នែកសំខាន់មួយរបស់ក្រុម Man City ប៉ុន្តែជាមួយខ្សែប្រយុទ្ធជនជាតិអាល់ហ្សេរី ដែលនឹងឈានដល់វ័យ ៣១ ឆ្នាំនៅឆ្នាំក្រោយនេះ ហាក់ធ្វើឲ្យអនាគតរបស់គេពិបាកនឹងរក្សាឲ្យមានសុវត្ថិភាពទាំងស្រុងខ្លាំងណាស់ ។
ហើយយ៉ាងណាមិញ យោងតាមការចុះផ្សាយចុងក្រោយមួយរបស់កាសែត Daily Mail បានឲ្យដឹងថា Man City មានឆន្ទៈក្នុងការដាក់លក់តារាឆ្នើមទាំង ២ រូបខាងលើ នៅរដូវក្តៅខាងមុខនេះ ស្របពេលពួកគេមានបំណងប្រមូលលុយទាំងនោះ ដើម្បីចុះហត្ថលេខាលើខ្សែបម្រើ Jack Grealish របស់ Aston Villa ជំនួសវិញ ។
លើសពីនេះរបាយការណ៍ដដែលបានបន្ថែមទៀតថាគ្រូបង្វឹកលោក Mikel Arteta មានបំណងចង់វិលមកជុំជាមួយខ្សែប្រយុទ្ធទាំង ២ នៅឯក្រុម Arsenal ម្តងទៀត ប៉ុន្តែទោះជាយ៉ាងណាវិបត្តិហិរញ្ញវត្ថុរបស់ក្រុមកាំភ្លើងធំ នឹងមិនអាចធ្វើឲ្យគាត់មានលទ្ធភាពនាំយកពួកគេទាំង ២ មកកាន់ទឹកដី Emirates បាននោះទេ ៕
ប្រភព: Sportmole