លោក Antonio Conte ខិតកាន់តែកៀកក្នុងការស៊ីញ៉េកិច្ចសន្យាសម្រាប់តំណែងអ្នកចាត់ការក្លិប Tottenham Hotspur ក្រោយចាកចេញពី Inter Milan ដោយជំនួសលោក Ryan Mason ដែលជាគ្រូបណ្ដោះអាសន្ន។
ដំបូងឡើយលោក Conte មានការផ្សារភ្ជាប់ក្នុងការទៅដឹកនាំក្រុម Real Madrid ប៉ុន្ដែមានការរាយការណ៍ថាការទាមទារប្រាក់ឈ្នួលខ្ពស់ ធ្វើឱ្យក្លិបយក្សអេស្ប៉ាញពិបាកនាំយកគ្រូបង្វឹកអ៊ីតាលីរូបនេះមកដឹកនាំក្រុម។
ហើយការត្រូវរូវគ្នាជាមួយ Spurs លោក Conte បានទាមទារប្រាក់ឈ្នួលប្រចាំឆ្នាំដល់ទៅ២០លានអឺរ៉ូ ដើម្បីមកដឹកនាំក្រុមនៅទីក្រុងឡុង ដែលមានន័យថាលោកជាគ្រូបង្វឹកទី៣ ដែលមានប្រាក់ឈ្នួលខ្ពស់បំផុតនៅក្នុងពិភពបាល់ទាត់។
ក្លិបមានខ្នាយមាសត្រូវបានរំពឹងថា នឹងប្រកាសថាលោក Conte នឹងក្លាយជាអ្នកចាត់ការក្លិបជាផ្លូវការនាពេលឆាប់ៗនេះ ហើយបើក្លិបអង់គ្លេសនេះ ព្រមចំណាយថ្លៃឈ្នួលតាមដែលលោកបានទាមទារនោះ មានន័យថាមានតែលោក Diego Simeone និងលោក Pep Guardiola ប៉ុណ្ណោះដែលទទួលបានប្រាក់ឈ្នួលច្រើនជាងបុរសវ័យ៥១ឆ្នាំរូបនេះ។
យោងតាមស្ថិតិដែលទួលបានសារព័ត៌មានបារាំង L’Equipe កាលពីខែមីនា បានបង្ហាញថា អ្នកចាត់ការក្លិប Atletico Madrid លោក Simeone ទទួលបានប្រាក់ឈ្នួលប្រចាំឆ្នាំខ្ពស់បំផុត ពោលគឺ៤៣លានអឺរ៉ូក្នុងមួយឆ្នាំ។ រីឯអ្នកចាត់ការក្លិបមេឃខៀវលោក Guardiola ទទួលបាន២២,៦លានអឺរ៉ូពីក្លិបអង់គ្លេស៕
ប្រភព៖ AS
អានអត្ថបទបន្ទាប់៖ លេចលឺថា Ancelotti ចង់ចុះកុងត្រាយកតារាឆ្នើមរបស់ក្រុម Everton ម្នាក់មក Real តែមិនមែនជា James
អ្នកចាត់ការទូទៅថ្មីរបស់ក្រុម Real Madrid លោក Carlo Ancelotti ត្រូវបានគេរាយការណ៍ថាចង់នាំយកខ្សែប្រយុទ្ធ Richarlison របស់ក្រុម Everton មកកាន់ទឹកដី Bernabeu នៅរដូវក្តៅខាងមុខនេះ ។
ជាក់ស្តែងអតីតកីឡាកររបស់ក្រុម Watford រូបនេះ ហាក់ជួបប្រទះជាមួយរដូវកាលដ៏លំបាកមួយ នៅក្នុងក្របខ័ណ្ឌ Premier League ដោយគេអាចស៊ុតបញ្ចូលទីត្រឹម ៧ គ្រាប់និង assist ៣ លើកប៉ុណ្ណោះពីការបង្ហាញខ្លួនទាំង ៣៤ លើក ។
តែទោះជាយ៉ាងណា Richarlison នៅតែអាចទាក់ទាញចំណាប់អារម្មណ៍ក្លឹបកំពូលៗ នៅអ៊ឺរ៉ុបជាច្រើន ខណៈពេលកន្លងទៅក្រុម Barcelona ធ្លាប់បានដាក់សំណើប្រមាណ ៨៥ លានផោនផងដែរ ប៉ុន្តែត្រូវបានបដិសេធដោយក្រុម Everton វិញ កាលពីខែមករាឆ្នាំ ២០២០ ។
ហើយឥឡូវនេះ យោងតាមការឲ្យដឹងថាពី Football Insider បានអះអាងថា Everton នឹងព្រមបើកចិត្តទទួលយកសំណើសម្រាប់ Richarlison សារជាថ្មី ប្រសិនបើខ្សែប្រយុទ្ធរូបនេះចង់ចាកចេញ ហើយលោក Ancelotti បានចាត់ទុកគេថាជាកីឡាករដ៏សក្តិសមមួយរបស់ សម្រាប់ក្រុម Real Madrid នៅរដូវកាលក្រោយ ។
ប្រភពប: Sportmole