ខណ:ទីផ្សារដោះដូររដូវក្តៅកាន់តែខិតជិតមកដល់ ក្រុមតោខៀវ Chelsea ហាក់កំពុងរៀបចំគម្រោងធំមួយ ក្នុងការចុះហត្ថលេខាលើកីឡាករថ្មីៗមួយចំនួន យកមកពង្រឹងក្រុមបន្ថែមទៀត សម្រាប់រដូវកាលថ្មី។
ហើយគោលដៅធំ ៣ ដែលគេយល់ថាគ្រូបង្វឹកលោក Thomas Tuchel ចង់យកមកកាន់ក្រុមរបស់ខ្លួននោះ អាចមានដូចជាខ្សែការពារស្លាបក្រុម Inter Milan កីឡាករ Achraf Hakimi ខ្សែការពារកណ្តាល Niklas Sule របស់ក្រុម Bayern Munich និងរួមទាំងខ្សែប្រយុទ្ធឆ្នើម Erling Haaland របស់ក្រុម Borussia Dortmund ទៀងផង ។
យ៉ាងណាបើយកបានដូចការគ្រោងទុកទាំងអស់នោះ គេរំពឹងថាជម្រើស ១១ នាក់ដំបូងរបស់ក្រុមតោខៀវ Chelsea នៅរដូវកាលក្រោយ ច្បាស់ជានឹងមានការផ្លាស់ប្តូរខ្លាំង ជាក់ជាមិនខាន ដោយមានកីឡាករនៅក្នុងឈុតដំបូងមួយរូប អាចនឹងត្រូវរុះរើចេញ ឬក៏ត្រូវលក់ទៅឲ្យក្លិបផ្សេងទៀតតែម្តង ។
ជាក់ស្តែងយោងតាមសារព័ត៌មានពី Daily Star ថ្មីៗនេះ បានធ្វើការបង្ហាញពីជម្រើស ១១ រូបដំបូងមួយ ដែលគ្រូបង្វឹកលោក Tuchel អាចនឹងប្រើប្រាស់សម្រាប់រដូវកាលក្រោយ ដូចខាងក្រោមនេះ ៖
សម្រាប់តំណែងអ្នកចាំទីគឺគ្មានការផ្លាស់ប្តូរអ្វីនោះទេ ដោយតួនាទីគឺជារបស់កីឡាករ Edouard Mendy ហើយពាក់ព័ន្ធជាមួយការចុះហត្ថលេខាលើ Hakimi មកកាន់ទឹកដី Premier League គេអាចនឹងមើលឃើញថាខ្សែការពារសញ្ជាតិម៉ារ៉ុករូបនេះ ប្រហែលត្រូវគ្រូបង្វឹកលោក Tuchel រុញឲ្យឡើងទៅលេងនៅតំបន់បម្រើការពារស្លាបស្តាំ រួមជាមួយកីឡាករ N’Golo Kante , Jorginho ដែលលេងក្នុងបម្រើកណ្តាល ខណ:កីឡាករ Ben Chilwell នឹងត្រូវលេងជាខ្សែបម្រើការពារស្លាបឆ្វេង ។
ដោយឡែក Reece James ដែលធ្លាប់តែកាន់កាប់តំណែងជាខ្សែការពារស្លាបស្តាំ អាចត្រូវប្តូរឲ្យលេងក្នុងតំបន់ការពារចំ រួមជាមួយកីឡាករ Thaigo Silva និងខ្សែការពារចំណូលថ្មី Niklas Sule ដែលសារព័ត៌មាន The Mirror បានរាយការណ៍ថាក្រុម Bayern Munich កំពុងមានឆន្ទ:លក់មកឲ្យក្លិប Chelsea ផងដែរ ។
ក្រៅពីនោះខ្សែប្រយុទ្ធ Erling Haaland ក៏អាចជាជម្រើសមួយផ្សេងទៀត ដែលក្រុម Chelsea នឹងនាំចូលក្រុមរដូវកាលក្រោយ ហើយគេនឹងត្រូវដាក់ឲ្យលេងជំនួសតំណែងរបស់កីឡាករ Timo Werner ក្នុងតំបន់ប្រយុទ្ធជួរមុខទាំង ៣ រួមជាមួយ Kai Havertz និង Mason Mount ៕
ប្រភព: Daily Star
អានអត្ថបទបន្ទាប់៖ Conte និយាយបែបបង្កប់ន័យ ក្រោយចរចាមិនត្រូវជាមួយ Spurs
លោក Antonio Conte បានទម្លាយមូលហេតុដែលលោកបោះបង់ឱកាសក្នុងការដឹកនាំ Tottenham Hotspur ដែលព្យាយាមក្នុងការនាំយករូបលោកបង្វឹកកីឡាករក្នុងក្រុមនៅរដូវកាលថ្មី។
អ្នកចាត់ការជនជាតិអ៊ីតាលី បានជួយឱ្យ Inter Milan ក្លាយជាជើងឯក Serie A ជាលើកដំបូងក្នុងរយៈពេល១១ឆ្នាំចុងក្រោយ ប៉ុន្ដែលោកបានចែកផ្លូវគ្នាជាមួយក្លិបដែលមានម្ចាស់ជាជនជាតិចិន ដែលចង់លក់កីឡាករក្រុមធំ ដើម្បីស្ដារស្ថានភាពហិរញ្ញវត្ថុ។
លោក Conte បានត្រៀមសម្រាប់ការត្រលប់អង់គ្លេស ជាទីដែលលោកធ្លាប់ដឹកនាំ Chelsea ឈ្នះ Premier League។ ទោះយ៉ាងណាក្ដី បុរសវ័យ៥១ឆ្នាំរូបនេះ បានខកឱកាសក្នុងការដឹកនាំក្រុមមាន់ខ្នាយមាស ហើយលោកក៏បានពន្យល់មូលហេតុផងដែរ។
លោក Conte បានថ្លែងប្រាប់ Gazzetta dello Sport ថា៖ “ជាទូទៅ ខ្ញុំចូលចិត្តការប្រកួតប្រជែង ហើយខ្ញុំបានទទួលយកការប្រកួតប្រជែងទាំងនេះនៅក្នុងអាជីពរបស់ខ្ញុំ”។
“ទោះបីជាក្លិបធំដែលខ្ញុំធ្លាប់ដឹកនាំ មិនស្ថិតក្នុងចំណោមក្រុមប្រជែងពាននោះទេពេលខ្ញុំបានទៅដល់។ ទោះយ៉ាងណាក្ដី ប្រសិនបើមានអ្វីដែលមិនជំរុញទឹកចិត្តខ្ញុំទេ ខ្ញុំសុខចិត្តមិនទទួលយក ទោះបីជាលុយប៉ុន្មានក៏ដោយ”៕
ប្រភព៖ Goal