មានរបាយការណ៍ថា Paul Pogba គេបានសម្រេចពីអនាគតរបស់គេរួចរាល់ហើយ ដោយព្រមចាយពេលមួយឆ្នាំចុងក្រោយនៅ Old Trafford បន្ទាប់មកពេលផុតកុងត្រា គេនឹងផ្ទេរទៅក្លឹប Real Madrid នៅលក្ខខណ្ឌឥតតម្លៃខ្លួន។
យ៉ាងណាក្លឹបបារាំង Paris Saint-Germain ហាក់មិនបោះបង់ឱកាសមួយនេះទាល់តែសោះ ដ្បិតអីទើបតែយកបាន Lionel Messi ក៏ដោយ។ ក្លឹបចង់បន្ថែមការនាំចូលកីឡាករឆ្នើមដូចជា Pogba មួយរូបទៀត ហើយហ៊ានឲ្យតម្លៃពលកម្មខ្ពស់ជាងផ្តល់ឲ្យ Neymar ទៅទៀត ឲ្យតែកីឡាករបារាំងព្រមផ្ទេរមកក្លឹបរបស់ខ្លួន។
បើតាមរបាយការណ៍ពី The Independent បានចុះផ្សាយថា ក្លឹប PSG កំពុងចរចាចង់ផ្តល់ប្រាក់ពលកម្ម ៥១០ ០០០ ផោន/សប្តាហ៍ឲ្យទៅកីឡាករវ័យ ២៨ ឆ្នាំ ប្រសិនគេព្រមជ្រើសយកក្លឹប PSG នៅទ្រនំបន្ទាប់ ហើយច្រានចោ.លសំណើរបស់ក្លឹប Barcelona និង Real Madrid ដែលលឺថាចង់បានគេដែរនោះ។
ទំហំថ្លៃពលកម្មនេះ នឹងរុញឲ្យ Pogba ឈរឈ្មោះជាកីឡាករស៊ីថ្លៃខ្ពស់បំផុតលំដាប់ទី ២ នៅក្លឹបបារាំង ដែលច្រើនជាង Neymar ចំនួន ២០ ០០០ ផោន តែនៅតិចជាង Messi ដែលរកបាន ៦៥០ ០០០ ផោន/សប្តាហ៍។
បញ្ជាក់ដែរថាខ្សែបម្រើកណ្តាលខាងលើបានចាយពេលលេងឲ្យឈុតធំ United ៥ ឆ្នាំមកហើយ សរុបបង្ហាញខ្លួន ២០៧ ប្រកួត រកបាន ៣៨ គ្រាប់និង Assist ៤៦ លើក។ គេនិងក្លឹប PSG សុទ្ធតែមិនទាន់ស្គាល់រសជាតិឈ្នះពាន UEFA Champions League ដូចគ្នា៕
ប្រភព៖ Sportsmole
អានអត្ថបទបន្ទាប់៖ Roy Keane ដាក់ចំៗថា Man utd គ្មានថ្ងៃបានលើកពានឡើយ បើមិនព្រមលៃលកវៃចេញ ៣ រូបនេះ
ស្របពេលក្លឹប Manchester United ត្រូវគេរំពឹងថាជាបេក្ខភាពលើកពាន Premier League មួយសម្រាប់រដូវកាលថ្មី តែខ្ញីចាស់ Roy Keane បែរជាមានមតិផ្ទុយពីគេ ដោយលោកទម្លាយថា United គ្មានថ្ងៃលើកពានឡើយ ព្រោះមានកីឡាករ ៣ រូបដែលបង្អាក់ដំណើរក្លឹប ខណៈពួកគេគឺ Jesse Lingard, Fred និង Scott McTominay។
ប្រាប់ទៅកាន់ Sky Sports បុរសខាងលើនិយាយ៖ “ខ្ញុំនៅតែមិនទុកចិត្ត United នៅឡើយ ថ្វីបើពួកគេចុះកុងត្រាបានតារាឆ្នើមប៉ុន្មានរូបក្ដី តែរឿងដែលខ្ញុំបារម្ភបំផុតនោះគឺ តំបន់កណ្ដាល ហើយរឹតតែមិនទុកចិត្តជាមួយខ្សែការពារស្លាបស្ដាំ”។
“ខ្ញុំគិតថា ពួកគេ (United) មានកីឡាករដែលមិនត្រូវប្រើច្រើនណាស់ ហើយ Ole គួរតែគិតគូរលក់ចេញកីឡាករខ្លះ និងទិញមកវិញនូវកីឡាករដែលចាំបាច់។ Jesse Lingard និងកីឡាករមួយចំនួនទៀត គួរតែលៃលកលក់ចេញ ព្រោះពួកគេមានតែបង្អាក់ដំណើរក្រុមប៉ុណ្ណោះ”។
“បើសួរខ្ញុំថា តើកីឡាករណាដែលបង្អាក់ដំណើរក្រុមទៅការប្រជែងពាន? នោះគឺ Jesse Lingard ហើយ Fred និង McTominay។ ខ្ញុំគិតថា ខ្សែការពារស្លាបមិនទាន់ល្អគ្រប់គ្រាន់សម្រាប់ការប្រជែងពានទេ តែកីឡាករទាំងនេះគឺសុទ្ធតែមានសមត្ថភាពគួរសម គ្រាន់តែថា បើប្រជែងពានគឺមិនអាចទៅរួច។ តាមមតិខ្ញុំ United ចាំបាច់បំផុតពេលនេះគឺ ខ្សែបម្រើឆ្នើម តែដូចនិយាយចឹង ពួកគេចាំបាច់ចំណាយលុយធំ ចឹងមានតែលក់កីឡាករចេញខ្លះ”។
យ៉ាងណា គ្រូបង្វឹក Ole Gunnar Solskjaer ក៏ចេញមុខតបតជាមួយ Keane វិញដែរ ដោយលោកមានមតិផ្ទុយពីអតីតកីឡាកររូបនេះ ព្រោះអ្នកចាត់ការជនជាតិន័រវែសជឿថា McTominay គឺជាកីឡាករសំខាន់មួយរូបនៅក្នុងក្រុម ដោយអាចរត់បានពេញមួយប្រកួត ជាមួយកាយសម្បទាដ៏រឹងមាំរបស់គេ៕
ប្រភព: Sportbible