ភារកិច្ចនៅលីគសម្រាប់ក្លឹប Man Utd ហាក់មមាញឹកខ្លាំងនៅពេលចុងក្រោយ ឥឡូវក៏វិលមកដល់ការប្រកួត UEFA Champions League ជាថ្មី ដោយសប្តាហ៍នេះ ជាជំនួបកាត់សេចក្តី រកក្រុមឡើងទៅវគ្គបន្ត រវាងក្លឹបអង់គ្លេស និងក្លឹបអេស្ប៉ាញ Atletico Madrid។ កាលពីជើងទី ១ ក្រុមទាំងពីរ បញ្ចប់លទ្ធផលស្មើ ១-១ នៅឯកីឡដ្ឋានក្នុងទីក្រុង Madrid។
ឥឡូវវិលមកប្រកួតនៅទឹកដី Old Trafford គ្រប់គ្នាកំពុងទន្ទឹងរង់ចាំ ថាតើ United អាចឆ្លងទៅកាន់វគ្គ ១/៤ ផ្តាច់ព្រ័ត្រ ឬត្រូវហាលអាវត្រឹមវគ្គនេះ? យ៉ាងណាយើងទទួលបានដំណឹងជាមុន ដែលជារឿងល្អសម្រាប់អ្នកគាំទ្រក្រុមបិសាចក្រហម នោះគឺកីឡាករឈុតធំរបស់ Atletico Madrid ដល់ទៅ ៨ រូប នឹងត្រូវអវត្តមាន។
មានដូចជា Yannick Carrasco ជាប់ពិ.ន័យព្យួរឈ្មោះ ក្រោមការកំណត់របស់សមាគម UEFA ហើយ ៧ រូបឯទៀត ពួកគេមានបញ្ហារបួ.ស។ តួយ៉ាងគឺ Thomas Lemar, Sime Vrsaljko, Mario Hermoso, Geoffrey Kondogbia, Matheus Cunha, Daniel Wass រីឯ Joese Gimenez ទើបតែរបួ.សថ្មីៗនេះ ពេលប្រកួតទល់ Cadiz នៅ La Liga កាលពីសប្តាហ៍មុន។
ផ្ទុយមកវិញ Koke, Angel Correa នឹងត្រលប់មកជួយក្រុម ក្រោយខក.ខានការប្រកួតនៅជើងទី ១។ រីឯកីឡាករសំខាន់ Antoine Griezmann និង Luis Suarez នៅតំបន់ប្រយុទ្ធ ក៏នឹងធានាវត្តមាន សម្រាប់ប្រកួតនៅវេលាទាបភ្លឺ ឈានចូលថ្ងៃពុធខាងមុខដូចគ្នា។ ក៏ប៉ុន្តែយើងជឿថា ក្រុមលោក Diego Simeone នឹងមិនអាចប្រើប្រាស់កីឡាករពេញជើង ដូចកាលពីជំនួបមុនៗបានឡើយ អ៊ីចឹងចាំមើលគ្រូអាហ្សង់ទីន នឹងដោះស្រាយដោយរបៀបណា?
ប្រភព៖ Sportsmole
អានអត្ថបទបន្ទាប់៖ ខ្លាំងអីតែ Man Utd! ឥឡូវ Newcastle ចូលប្រជែងកំពូលកីឡាករ ២ រូបនេះដែរហើយ
ក្លឹបសារិកាព្រៃ Newcastle United បានផ្សារភ្ជាប់ទៅក្នុងចចាមអារ៉ាមចង់នាំយកកីឡាករកំពូលជាច្រើន នៅទីផ្សារដោះដូររដូវក្តៅខាងមុខ ហើយថែមទាំងត្រូវប្រជែងជាមួយបណ្តាក្លឹបយក្សនៅក្របខ័ណ្ឌ Premier League ទៀតផង។
បើតាមសារព័ត៌មាន Daily Mail ចុះផ្សាយថា ក្លឹបដឹកនាំដោយអ្នកចាត់ការលោក Eddie Howe បានសម្លឹងខ្សែការពារនៃក្លឹប Chelsea គឺ Antonio Rudiger និងខ្សែបម្រើការពារ Kalvin Phillips របស់ក្លឹប Leeds United។
អ្នកទាំងពីរ សុទ្ធតែធ្លាប់ស្ថិតក្រោមរ៉ាដាចង់បានរបស់ក្លឹប Man Utd នៅពេលចុងក្រោយ រីឯ Phillips មានទាំងក្លឹប West Ham, Aston Villa, Liverpool ក៏ចង់បានដូចគ្នា។ នេះហៅថា Newcastle ហ៊ានហើយ ព្រោះអីមួយជាកីឡាករស៊ីថ្លៃ មួយជាកីឡាករតម្លៃកប់ពពក ដែលគេកំពុងល្បីតាមចែចូវនៅពេលចុងក្រោយ។
បញ្ជាក់ថា កីឡាករអាល្លឺម៉ង់ Rudiger នឹងក្លាយជាកីឡាករឥតតម្លៃផ្ទេរនៅ ក្រោយថ្ងៃទី ៣០ មិថុនា ឆ្នាំ ២០២២ ប៉ុន្តែការចរចាតម្លៃពលកម្មសម្រាប់គេ គឺជារឿងធំដល់ក្លឹបដែលចង់បាន ព្រោះយ៉ាងហោចណាស់ក៏លើស ២៥០ ០០០ ផោន/សប្តាហ៍ដែរ។ រីឯ Phillips គេសេសសល់កុងត្រាដល់រដូវក្តៅ ឆ្នាំ ២០២៤ ឯណោះ ជាមួយនឹងតម្លៃខ្លួនខ្ពស់ ល្បាក់ ៦០ លានផោនឡើង៕
ប្រភព៖ Daily Mail