ការប្រកួត UEFA Champions League វគ្គផ្ដាច់ព្រ័ត្ររវាង Liverpool និង Real Madrid នឹងប្រព្រឹត្តទៅនៅថ្ងៃសៅរ៍នេះហើយ ក្នុងទីក្រុងប៉ារីសប្រទេសបារាំង ស្របពេលក្រុមទាំងពីរ បានត្រៀមខ្លួនរួចជាស្រេចដើម្បីចូលរួមការប្រកួតនេះ។
ក្រុមហង្សក្រហមដែលសម្បូរទៅដោយកីឡាករល្អៗរាប់ចាប់តាំងពីអ្នកចាំទីដល់ខ្សែប្រយុទ្ធ អាចធ្វើឱ្យអ្នកចាត់ការ Jurgen Klopp មានការពិបាក ក្នុងការសម្រេចចិត្តថាតើកីឡាកររូបណា នឹងត្រូវលេងក្នុងជម្រើស១១នាក់ដំបូង។
ខ្សែការពារឆ្នើម Virgil van Dijk អាចត្រូវបានរំពឹងខ្ពស់ថា នឹងលេងក្នុងជម្រើសដំបូង ក្នុងការប្រកួតផ្ដាច់ព្រ័ត្រ UCL រាត្រីនេះ ប៉ុន្ដែមិនទាន់ប្រាកដទេថា តើកីឡាកររូបណា នឹងលេងជាដៃគូរបស់គេ។
ហើយអតីតអ្នកចាំទីអង់គ្លេស Paul Robinson បង្ហាញការយល់ឃើញផ្ទាល់ខ្លួនថា Joel Matip គួរតែអង្គុយបម្រុង ខណៈកីឡាករចំណូលថ្មី Ibrahima Konate គួរតែលេងតំបន់ការពារកណ្ដាលជាមួយកីឡាករឆ្នើមហូឡង់។
លោក Robinson បានថ្លែងប្រាប់ Football Insider ថា៖ “ទាំង Matip និង Konate លេងមិនសូវបានល្អទេទល់នឹង Wolves កាលពីចុងសប្ដាហ៍កន្លងទៅ។ ប៉ុន្ដែនរណាដែលលេងជាមួយ Van Dijk នឹងមានភាពប្រសើរឡើង។ គេជាកីឡាករលំដាប់ពិភពលោក និងជាអ្នកដឹកនាំ។ ពួកគេអាចជ្រើសយក Matip ឬ Konate”។
“ខ្ញុំគិតថាលោក Jurgen Klopp នឹងជ្រើសយក Konate។ ពួកគេមានទំនាក់ទំនងល្អជាមួយគ្នា។ ពួកគេធ្វើការជាមួយគ្នាបានល្អ នៅក្នុង Champions League រដូវកាលនេះ”៕
ប្រភព៖ Goal