ខ្សែការពារស្លាបស្ដាំ Sergino Dest បង្ហាញពីគោលជំហររបស់ខ្លួន ក្នុងការបន្ដលេងនៅ Barcelona ប៉ុន្ដែឱកាសបង្ហាញខ្លួនរបស់គេ អាចនឹងត្រូវបានរឹតត្បិត ហើយក៏អាចប្រឈមបាត់បង់កៅអី FIFA World Cup សម្រាប់ក្រុមជម្រើសជាតិអាមេរិកដែរ។
ក្នុងនាមជាកីឡាករអាមេរិកម្នាក់ ការបង្ហាញខ្លួនក្នុងការប្រកួតក្នុងក្រុមធំដូចជា Barcelona អាចផ្ដល់ឱកាសឱ្យ Dest អាចមានប្រៀបលើកីឡាករផ្សេងទៀតក្នុងតំណែងដូចគ្នា សម្រាប់ជម្រើសគ្រូបង្គោល Gregg Berhalter។
ប៉ុន្ដែគួរឱ្យស្ដាយ Dest មានបញ្ហាមួយដែលត្រូវបារម្ភគឺ គេមិនទទួលបានទំនុកចិត្តពីអ្នកចាត់ការ Xavi នោះទេ ដូចអ្វីដែលយើងបានឃើញ ក្នុងការប្រកួតមិត្តភាពមុនបើករដូកាលកន្លងមក។
ទោះមានក្ដីរំពឹងថា ឱកាសនៃការចូលលេងរបស់ Dest អាចនឹងកើនឡើង ក្រោយការចាកចេញរបស់ Dani Alves ស្របពេលដែល César Azpilicueta មិនអាចផ្លាស់មក Camp Nou ប៉ុន្ដែកីឡាករអាមេរិករូបនេះ មិនមែនជាកីឡាករសំខាន់នៅក្នុងការប្រកួតធំៗទេ ខណៈ Ronald Araujo និង Jules Kounde អាចលេងនៅតំបន់ស្លាបខាងស្ដាំបាន ដែលជាជម្រើសផ្សេងបន្ទាប់ពី Sergi Roberto។
ស្របពេលដែល ជម្រើសផ្សេងទៀតនៅក្នុងក្រុមជម្រើសជាតិអាមេរិកគឺ DeAndre Yedlin និង Joe Scally បង្ហាញខ្លួនក្នុងជម្រើសដំបូង សម្រាប់ Inter Miami និង Borussia Monchengladbach អាចបង្ហាញបានថា ឱកាសរបស់ Dest ក្នុងក្រុមអាមរិក ដែលត្រូវធ្វើដំណើរទៅកាតារ ស្ថិតនៅក្នុងភាពមិនច្បាស់លាស់៕
ប្រភព៖ Diario AS