ខ្សែបម្រើឆ្នើមរបស់ជម្រើសជាតិអង់គ្លេស គឺ Jude Bellingham កំពុងទទួលបានការសាទរ ទាំងការលេងឲ្យក្លឹបអាជីព Borussia Dortmund និងជម្រើសជាតិនៅ World Cup ហើយពេលបន្ទាប់ ក៏ជឿថា ប្រហែលនឹងត្រូវបានក្លឹបថ្មីណាមួយ នាំយកនៅតម្លៃកល់ផងដែរ។
បើតាមរបាយការណ៍ពី El Nacional ចុះផ្សាយថា ក្លឹបអធិរាជស Real Madrid ក៏ស្ថិតក្នុងគោលជំហរចង់ប្រជែង Bellingham ជាមួយបណ្តាក្លឹបដទៃ មាន Manchester United និង Liverpool ជាដើម តែយ៉ាងណាកត្តាតម្លៃខ្លួន របស់កីឡាករ ប្រហែលអាចជាបញ្ហា ព្រោះខាងក្លឹបអាណាព្យាបាលដាក់មកខ្ពស់ពេក។
Dortmund ទារ ១៥០ លានអឺរ៉ូឯណោះ ម្ល៉េះការចាយលុយសុទ្ធ ប្រហែលមិនជារឿងងាយឡើយ កុំថាឡើយ Real Madrid ក៏ដោយ។ ម្ល៉េះហើយក្លឹបដឹកនាំដោយប្រធានលោក Florentino Perez ក៏បានចេញផែនការណ៍ថ្មី នោះគឺប្រើប្រាក់មួយផ្នែក ហើយញាត់ឈ្មោះ Eduardo Camavinga ទៅក្នុងការដោះដូរនោះ។
យុវជនវ័យ ២០ ឆ្នាំរបស់ក្លឹបដឹកនាំដោយអ្នកចាត់ការលោក Carlo Ancelotti ក៏កំពុងធ្វើបានល្អផងដែរ តែបើចាំបាច់ត្រូវចង់បាន Bellingham ហើយ អ៊ីចឹងមានតែត្រូវហ៊ានលះបង់។ ហាងឆេងតម្លៃខ្លួន Camavinga អាចទទួលបាន ៥០ ទៅ ៧០ លានអឺរ៉ូ អ៊ីចឹងក្លឹប Real Madrid នឹងត្រូវចាយលុយសុទ្ធក្រោម ១០០ លានអឺរ៉ូប៉ុណ្ណោះ៕
ប្រភព៖ El Nacional