ទន្ទឹមការប្រកួត FIFA World Cup កំពុងដំណើរការ នោះក៏ជាពេលវេលារបស់ក្លឹបធំៗនៅអឺរ៉ុប ឆ្លៀតពេលសម្លឹងមើលគុណភាពកីឡាករក្លឹបដទៃ ដើម្បីសិក្សាមើលតើគួរយកនរណាមកចូលរួម នៅទីផ្សារដោះដូររដូវរងាឆ្នាំ ២០២៣ ខាងមុខ។
ងាកទៅក្លឹប ៣ នៅអង់គ្លេស មាន Chelsea, Manchester United និង Newcastle United កំពុងដាក់អារម្មណ៍លើគោលដៅតែមួយ ជាអ្នកចាំទីជម្រើសជាតិព័រទុយហ្គាល់គឺ Diogo Costa។ នេះបើតាមរបាយការណ៍ពី Relevo បានចុះផ្សាយ។
កីឡាកររបស់ក្លឹប FC Porto ការលេងនៅក្លឹបធ្វើបានល្អ តែយ៉ាងណាការបង្ហាញខ្លួនឲ្យជម្រើសជាតិជុំដំបូងវគ្គចែកពូលថ្ងៃមុន រាងភ្លាត់បន្តិច។ នៅចុងម៉ោងប៊ិះតែនឹងធ្វើឲ្យហ្គាណាអាចស្មើគ្រាប់បាល់ ក្រោយមិនបានដឹងថាមានកីឡាករគូប្រជែងនៅពីក្រោយ ហើយទម្លាក់បាល់ប្រុងទាត់ធ្វើមិនដឹង សំណាងហើយខាងកីឡាករក្រុមហ្គាណារអិលជើង កុំអីបើកឲ្យគេមួយគ្រាប់ធូរ។
តាមប្រភពបានឲ្យដឹងថា Jorge Mendes ជាភ្នាក់ងារកីឡាករ Costa ក៏កំពុងសិក្សារវាងភាគីបណ្តាក្លឹបដែលចង់បានអ្នកចាំទីខាងលើផងដេរ។ ភ្នាក់ងារហាក់ដាក់តម្លៃឲ្យ Porto គិតគូររួចរាល់ គឺ ៧៥ លានអឺរ៉ូ ដែលភ្នាក់ងារកំពុងជជែកជាមួយបណ្តាក្លឹបដែលចង់បានធំៗនៅអឺរ៉ុប៕
ប្រភព៖ Relevo