ក្លិប Nottingham Forest មានក្ដីព្រួយបារម្ភចំពោះការរក្សាកៅអីនៅ Premier League រដូវកាលនេះ ដ្បិតអ្នកចាំទីឆ្នើម Dean Henderson ដែលពួកគេបានខ្ចីជើងពីក្លិប Manchester United បានរងរបួស អំឡុងការប្រកួតទល់នឹង Leicester City។
ដើម្បីជាការដោះស្រាយបញ្ហាលំបាក ថ្នាក់ដឹកនាំរបស់ Forest បានព្យាយាមក្នុងការចរចានាំយក អ្នកចាំទី Keylor Navas របស់ក្លិប Paris Saint–Germain មកចូលក្រុម។
ប្រភពពីសារព័ត៌មាន L’Equipe បានចុះផ្សាយលើទំព័រមុខថា PSG នៅមានភាពស្ទាក់ស្ទេើរ ថាតើពួកគេគួរតែអនុញ្ញាតឱ្យក្លិបនៅ Premier League ខ្ចីជើងកីឡាករកូស្ដារីការូបនេះ ដោយភ្ជាប់នូវលក្ខខណ្ឌទិញផ្ដាច់ឬយ៉ាងណានោះទេ។
ប្រសិនបើការផ្ទេរអាចសម្រេចទៅបាន គឺត្រឹមតែការព្រមព្រៀងខ្ចីជើងប៉ុណ្ណោះ។ អតីតកីឡាកររបស់ Real Madrid រូបនេះ នៅសល់កុងត្រាជាមួយក្លិបយក្សបារាំង រហូតដល់ឆ្នាំ២០២៤ ហើយ Forest ពុំមានលទ្ធភាពចំណាយតាមការទាមទាររបស់ពួកគេនោះទេ។
Navas ទទួលបានប្រាក់ឈ្នួល៩លានអឺរ៉ូក្នុងមួយរដូវកាលនៅ PSG ដូច្នេះក្លិប Forest ត្រូវរ៉ាប់រងលើការចំណាយពេញលេញ ឬមួយភាគធំលើប្រាក់ឈ្នួលរបស់គេដែរ ប្រសិនបើព្រមព្រៀងខ្ចីជើង។
នេះក៏អាចជាឱកាសសម្រាប់ Navas ក្នុងការទទួលយកបទពិសោធនៅ Premier League ផងដែរ ដោយរូបគេធ្លាប់លេងនៅអេស្ប៉ាញ និងបារាំងរួចមកហើយ៕
ប្រភព៖ Be Soccer