ខ្សែប្រយុទ្ធឈរជើងឲ្យក្លឹបម្ចាស់ដី Camp Nou គឺ Robert Lewandowski បានបង្ហើបក្នុងបទសម្ភាសន៍ជាមួយ Interia Sport កន្លងទៅ បន្ទាប់ការឈ្នះពានរង្វាន់ La Liga ដោយថា ក្លឹបអេស្ប៉ាញពិតជាសម្លឹងការចង់បានតារាឆ្នើមអាហ្សង់ទីនជាថ្មី ហើយខ្លួនលោកផ្ទាល់ក៏ពិតជាចង់រួបរួមគ្នាផងដែរ។
កីឡាករប៉ូឡូញជាការពិតនៅរដូវកាលដំបូង រាប់ថាសម្រេចសមិទ្ធផលជាដុំកំភួនដ្បិតបានឈ្នះពានលីគកំពូលអេស្ប៉ាញ La Liga ហើយស្ថិតិការរកគ្រាប់បាល់របស់គេ ក៏រុញដល់ឈរតំណែង Top Scorer សព្វថ្ងៃមាន ២៣ គ្រាប់ នាំមុខដាច់កីឡាករដទៃទៀត។
អតីតសមាជិក Bayern Munich លើកឡើង៖ “ពេលអ្នកគិតដល់ Barcelona គឺអ្នកនឹងនឹកដល់ហៅឈ្មោះ Messi ពេលនឹកឈ្មោះ Messi ក៏នឹងនឹកដល់ហៅឈ្មោះក្លឹប Barca ខ្ញុំយល់ច្បាស់អំពីគុណតម្លៃ ដែល Leo នឹងនាំមកកាន់ក្រុមរបស់ពួកយើង”។
លោកបន្ត៖ “មិនត្រឹមតែលើទីលានប៉ុណ្ណោះទេ តែក៏សម្រាប់ក្លឹបទាំងមូលផងដែរ ខ្ញុំតែងចូលចិត្តលេងជាមួយកីឡាករដែលយល់ច្បាស់អំពីបាល់ ហើយ Messi គឺស្ថិតនៅកម្រិតកំពូល តែប៉ុន្មានឆ្នាំចុងក្រោយក៏គាត់រាងផ្លាស់ប្តូររបៀបលេងបន្តិចដែរ អាចថាគាត់លើសពីតំណែងលេខ ១០ ចូលមកតំណែងបម្រើខ្លះហើយ”៕
ប្រភព៖ BeSoccer