ក្លឹបបិសាចក្រហម Manchester United ត្រូវបានរាយការណ៍ ថាកំពុងត្រៀមខ្ទង់ចំណាយដល់ ១០០ លានអឺរ៉ូ លើការផ្តាច់កុងត្រានាំយកអតីតយុវជននៅទ្រនំអង់គ្លេស Coventry គឺ Viktor Gyokeres ដែលសព្វថ្ងៃបម្រើអាជីពឲ្យក្លឹបព័រទុយហ្គាល់ Sporting CP ឯណោះ។
កីឡាករវ័យ ២៥ ឆ្នាំលេងតំណែងប្រយុទ្ធប្រអប់ សញ្ជាតិស៊ុយអែត កន្លងមកគេត្រូវបានក្លឹប Sporting ចាយលុយត្រឹម ២១ លានអឺរ៉ូប៉ុណ្ណោះ ដល់ឥឡូវមានតម្លៃផ្តាច់កុងត្រាកៀកគុណជា ៥ ប្រសិនខាងក្លឹបម្ចាស់ដី Old Trafford ចង់បាន ដែលវារាប់ជាតួលេខចំណេញកប់ពពក។
នៅរដូវកាលនេះ ឃើញថាទម្រង់របស់ Gyokeres ឡើងកូតខ្លាំង ត្រង់ស្ថិតិបង្ហាញខ្លួនសរុប ៣២ ប្រកួត គេក៏អាចរកបានដល់ទៅ ២៩ គ្រាប់និង Assist ១១ លើក។ នេះបើយកគេមកអង់គ្លេស តាមការស្មានជាមុន ទំនងនឹងសហការបានល្អជាមួយ Rasmus Hojlund នៅប្រអប់ខាងលើ។
បើតាមសារព័ត៌មាន Fichajes ចុះផ្សាយ តម្លៃផ្តាច់កុងត្រា ១០០ លានអឺរ៉ូ សម្រាប់ United ជាភាគីចង់បាន ពួកគេហាក់ត្រៀមលក្ខណៈរួចរាល់អស់ហើយ នេះរង់ចាំតែដល់ថ្ងៃទីផ្សារដោះដូររដូវក្តៅ ក្រោយបិទបញ្ចប់រដូវកាល ២០២៣/២៤ បើកទ្វារដំណើរការតែប៉ុណ្ណោះឯង។ ការយកមកនេះ អាចជានឹងបំពេញវត្តមាន Anthony Martial/Jadon Sancho ជាដើម មានដំណឹងល្ហៀងៗអាចចែកផ្លូវ៕
ប្រភព៖ Fichajes