ក្លិប Barcelona បានកំណត់យកអតីតតារាឆ្នើមរបស់ក្រុម Real Madrid មួយរូប ជាគោលដៅផ្ទេរចម្បងរបស់ខ្លួន នៅពេលដែលក្លិបកាតាឡាន់ កំពុងស្វែងរកអ្នកមកជំនួសតំណែងរបស់ខ្សែប្រយុទ្ធ Ousmane Dembele ដែលអាចនឹងចាកចេញ នៅរដូវក្តៅនេះ ។
ជាក់ស្តែង នៅមួយរយ:ពេលចុងក្រោយនេះ កីឡាករ Angel Di Maria ត្រូវបានគេរាយការណ៍ថា កំពុងចាប់អារម្មណ៍ក្នុងការត្រលប់ទៅក្របខ័ណ្ឌ La Liga វិញ ហើយការផ្ទេរនេះ អាចនឹងធ្វើឱ្យគេកាត់បន្ថយប្រាក់ឈ្នួលយ៉ាងច្រើន ដើម្បីទៅលេងឱ្យក្រុម Barca នៅរដូវកាលក្រោយ ។
មិនតែប៉ុណ្ណោះ កិច្ចសន្យារបស់ Di Maria ជាមួយ Paris Saint-Germain នឹងត្រូវផុតសុពលភាព នៅត្រឹមចុងមិថុនានេះហើយ ខណ:វាត្រូវបានគេបញ្ជាក់យ៉ាងច្បាស់ថា កីឡាករសញ្ជាតិអាហ្សង់ទីនរូបនេះ នឹងក្លាយជាកីឡាករគ្មានតម្លៃខ្លួន នៅទីផ្សាររដូវក្តៅនេះ ។
គួរឱ្យដឹងថា Di Maria អាចរកបានប្រហែល ១៣ លានអឺរ៉ូក្នុងមួយឆ្នាំ ក្រោមកិច្ចសន្យាជាមួយក្លិប PSG ប៉ុន្តែ Barcelona អាចផ្តល់ឱ្យអតីតតារាឆ្នើមរបស់ក្រុម Real Madrid រូបនេះ មិនលើសពី ២ លានអឺរ៉ូក្នុងមួយឆ្នាំនោះឡើយ ប្រសិនបើគេយល់ព្រមផ្ទេរមកនោះ ៕
ប្រភព: Sportskeeda