ថ្មីៗនេះ ក្លិបតោខៀវ Chelsea ត្រូវបានគេរាយការណ៍ថា កំពុងទទួលបានឱកាសធំ ក្នុងការនាំចូលខ្សែប្រយុទ្ធឆ្នើមមួយរូប មកកាន់ក្រុមរបស់ខ្លួនបន្ថែមទៀត បន្ទាប់ពីអតីតកីឡាកររបស់ក្រុម Manchester United ម្នាក់ បង្ហាញថាគេចង់បញ្ចប់ការផ្ទេរមកកាន់ទឹកដី Stamford Bridge ឱ្យបានឆាប់ មុនពេលទីផ្សារបិទវិញ ។
ជាក់ស្តែង ម្នាក់នោះ គឺខ្សែប្រយុទ្ធ Wilfried Zaha នៅពេលដែលកីឡាករសញ្ជាតិកូតឌីវ័ររូបនេះ ត្រូវបានគេរំពឹងថាចង់បញ្ចប់ការស្នាក់នៅជាមួយក្លិប Crystal Palace នៅត្រឹមទីផ្សាររដូវក្តៅនេះ ។
គួរឱ្យដឹងថា Zaha នៅសល់ពេលត្រឹមតែមួយឆ្នាំទៀតប៉ុណ្ណោះ ដើម្បីដំណើរការកុងត្រាបច្ចុប្បន្នរបស់គេ នៅទឹកដី Selhurst Park ខណ:វាកំពុងធ្វើឱ្យក្លិបមួយនេះ ស្ថិតនៅក្នុងស្ថានភាពលំបាកមួយ ដើម្បីកំណត់អនាគតរបស់ខ្សែប្រយុទ្ធរូបនេះ ។
ហើយឥឡូវនេះ បើយោងតាមរបាយការណ៍ពី talkSPORT បានអះអាងថាអតីតកីឡាករ Manchester United រូបនេះ កំពុងបើកចំហរក្នុងការចុះហត្ថលេខាជាមួយ Chelsea ចំពេលក្រុមរបស់លោក Tuchel ក៏បានត្រៀមធ្វើការទាក់ទងជាមួយអ្នកតំណាងរបស់កីឡាកររួចរាល់ហើយផងដែរ។
បញ្ជាក់ថា Zaha បានបង្ហាញខ្លួនតែបួនដងប៉ុណ្ណោះសម្រាប់ក្រុម Manchester United មុនពេលត្រលប់ទៅកាន់ក្រុម Crystal Palace វិញ ក្នុងលក្ខខណ្ឌអចិន្ត្រៃយ៍ នៅឆ្នាំ ២០១៥ ហើយចាប់តាំងពីពេលនោះមក គេតែងបានបង្ហាញសមត្ថភាពដ៏ល្អ និងទទួលបានការចាប់អារម្មណ៍ជាច្រើន ៕
ប្រភព: Sportmole